Türkiyə rəhbərliyi alman deputatların İncirlik hərbi bazasına ziyarətinə icazə verməsə, cavabımız sərt olacaq.

Axar.az xəbər verir ki, bu sözləri Almaniya Bundestaqının Müdafiə Komissiyasının sədri Volfqanq Hellmix deyib.

Onun sözlərinə görə, parlament türklərin bu addımına cavab olaraq, "Avaks" tipli kəşfiyyat təyyarələrin İncirlik bazasına göndərilməsinə mane ola bilər.

Qeyd edək ki, Almaniya kansleri Angela Merkel NATO sammitində "Avaks" təyyarələrinin İncirlik hərbi bazasında yerləşdirilməsini gündəmə gətirəcəklərini deyib.

Ötən ay rəsmi Ankara Almaniya müdafiə nazirinin müavininin rəhbərlik etdiyi deputatlardan ibarət nümayəndə heyətinin İncirlik hava bazasına baş çəkməsinə razılıq verməyib. Türkiyə hökuməti bundan əvvəl Almaniya Müdafiə Nazirliyində akkreditasiyadan keçən almaniyalı jurnalistlərin də hava bazasına girişinə qadağa qoyub.

Türkiyə tərəfinin bu addımının səbəbi iyunun 2-də Almaniya parlamentinin qondarma erməni soyqırımı ilə bağlı qətnamə qəbul etməsi ilə izah olunur.