Türkiyə Prezidenti Rəcəb Tayyib Ərdoğan 1920-ci ildə təsis olunan hərbi müşavir sistemini ləğv edib.

Axar.az xəbər verir ki, bundan sonra prezidentin hərbi müşaviri olmayacaq.

Bu vaxta qədər Türkiyə prezidentinin biri baş yavər olmaqla 5 yavəri olurdu. Prezidentin hər addımında yanında olan baş yavər dövlət başçısının avtomobilinə minə bilən yeganə şəxsdir.

Lakin dövlət çevrilişinə cəhddən sonra baş yavər Əli Yazıcı və digər dörd yavər həbs olunub.

Prezidentin digər qərarına əsasən, Ankaranın Beştəpə bölgəsində yerləşən Prezident Sarayının mühafizəsi də fərqli formada təşkil olunacaq.

Belə ki, Prezident Sarayında hava hücumundan müdafiə sistemi tətbiq olunacaq, yarana biləcək təhdidlərə qarşı anında raketlə cavab veriləcək.

Xatırladaq ki, 15 iyul dövlət çevrilişinə cəhd zamanı F-16-lar Prezident Sarayını vurmaq istəmişdi. Lakin MİT xüsusi təyinatlıları daşına bilən hava müdafiə sistemləri ilə sarayı qoruya bilmişdi.