Ana səhifə Toplum |
Bakı Ağır Cinayətlər Məhkəməsində "Azərbaycan Beynəlxalq
Bankı" Açıq Səhmdar Cəmiyyətinin İdarə Heyətinin sabiq sədri
Cahangir Hacıyev və onunla birlikdə təqsirləndirilən digər 7
nəfərin cinayət işi üzrə məhkəmə fasilədən sonra davam
etdirilib.
APA-nın məlumatına
görə, hakim Əfqan Hacıyevin sədrlik etdiyi prosesdə C. Hacıyevin
vəkili Fəxrəddin Mehdiyev məhkəmə prosesinin sürətli keçirilməsinə
etiraz edib, bu səbəbdən hüquqlarını müdafiə etdiyi şəxslərlə
məsləhətləşə bilmədiklərini deyib.
Sonra təqsirləndirilən Anar Sultanov ifadəsində bildirib ki,
1997-ci ildən 2004-cü ilə qədər Beynəlxalq Bankda müxtəlif
vəzifələrdə çalışıb, 2004-dən 2014-cü ilə qədər isə bankın Mərkəzi
filialının rəhbəri olub. O əlavə edib ki, qaydalara görə, baş
idarənin göstərişi olmadan təminatsız 2000, təminatlı isə 5000 min
manat kredit vermək səlahiyyəti olub: "Amma bu rəqəmdən yuxarı
məbləğlər Kredit Komitəsi və İdarə Heyətinin qərarı ilə ayrılırdı.
Baş idarə qərar verəndən sonra kredit ayrılması məsələsində filial
daha çox texniki rol oynayırdı. İdarə Heyətinin qərarları mənim
üçün məcburi xarakter daşıyırdı".
O, ibtidai istintaqa verdiyim ifadələrini təsdiqlədiyini də
bildirib.
Sonra A. Sultanov prokurorun suallarını cavablandırıb. Prokurorun
"Cahangir Hacıyev və yaxınlarına plastik kartla limitsiz kredit
verilirdimi" sualına cavabında A. Sultanov deyib ki, İdarə Heyəti
nə qərar veribsə, onu icra ediblər. O bu işlə bağlı Cahangir
Hacıyevdən göstəriş aldığını etiraf edib.
A. Sultanov C. Hacıyevin sürücüsü Aydın Mehdiyevin adına kredit
ayrılması ilə bağlı prokurorun sualını da cavablandırıb: "Aydın
Mehdiyevin işləri çox olduğundan onun adına kreditin ayrılması ilə
bağlı sənədləri baş idarəyə göndərmişəm. Ordan təsdiq gəldikdən
sonra krediti vermişəm. Həmin kredit isə 2009-cu ilin avqustunda
bağlanılıb".
Dövlət ittihamçısı sürücünün adına 9 milyon manat kreditin
verilməsinin düzgün olub-olmadığını soruşub. A. Sultanov isə
cavabında İdarə Heyətinin qərarına tabe olduğunu deyib: "Mən
işlədiyim müddətdə heç bir dəstədə olmamışam, vəzifə
səlahiyyətlərimi icra etmişəm və mənimsəməyə yol verməmişəm. İdarə
Heyəti nə qərar qəbul edirdisə, biz onu icra edirdik".
C. Hacıyev də A. Sultanova müəyyən suallar verib və prokurorun
adını sadaladığı şəxslərin - ailə üzvlərinin hansı filialın
müştərisi olduğunu soruşub.
A. Sultanov da həmin şəxslərin Mərkəzi filialın müştərisi olduğunu
və kreditlə bağlı nümunələrin də orada saxlanıldığını deyib. C.
Hacıyev A. Sultanovdan ona hər hansı qanunsuz göstəriş
verib-vermədiyini soruşub. A. Sultanov "xeyr" cavabını verib.
Sonra digər təqsirləndirilən İlqar Abdullayev ifadə verib. O qeyd
edib ki, 2004-cü ildən bankda çalışıb, 2014-2015-ci illərdə Mərkəzi
filialın müdiri olub: "Cahangir Hacıyevi yalnız bir dəfə - İdarə
Heyətinin iclasında bu vəzifəyə təyin olunanda görmüşəm. Mən heç
bir mütəşəkkil dəstənin üzvü olmamışam. Yalnız İdarə Heyəti
sədrinin müavinlərinin tapşırığını yerinə yetirmişəm".
İ. Abdullayev də prokurorun suallarını cavanlandıraraq qeyd edib
ki, 3 kredit müqaviləsində imzası olub: "Müqavilələrin hər üçünün
eyni gündə imzalanması məhz təsadüfdür. Araşdırsanız görərsiniz ki,
həmin kreditlərin verilməsi ilə bağlı qərarlar ayrı-ayrı vaxtlarda
verilib".
Proses günün ikinci yarısında davam edəcək.
Qeyd edək ki, C. Hacıyev, Beynəlxalq Bankın Mərkəzi filialının
direktoru vəzifəsində işləmiş Anar Sultanov, bankın Mərkəzi
filialın müdiri işləmiş İlqar Abduallayev, "İnter Security" MMC-nin
direktoru işləmiş İbrahim Hüseynov, Mərkəzi filialın direktoru
işləmiş Yusif Ələkbərov, bankın Nəqliyyat filialının direktoru
işləmiş Kənan Orucov, bankın Nərimanov filialının direktoru
işləmiş, hazırda AFB Bankın sədri olan Məmməd Cahangirov və Bakı
Fındıq Zavodunun direktoru işləmiş Azad Cavadov Cinayət
Məcəlləsinin 179.3.1, 179.3.2 (mütəşəkkil dəstə tərəfindən külli
miqdarda mənimsəmə), 308.2 (vəzifə səlahiyyətlərindən sui-istifadə
ağır nəticələrə səbəb olduqda), 309.2 (vəzifə səlahiyyətlərini aşma
ağır nəticələrə səbəb olduqda), 313-cü (vəzifə saxtakarlığı), 228.1
və 228.4-cü (qanunsuz olaraq silah, onun komplekt hissələrini,
döyüş sursatı, partlayıcı maddələr və qurğular əldə etmə, başqasına
vermə, satma, saxlama, daşıma və gəzdirmə) maddələri ilə ittiham
olunur.
Tarix
2016.08.26 / 14:52
|
Müəllif
Axar.az
|