Ana səhifə İqtisadiyyat |
Neft ilin sonuna kimi 50 dollar intervalında bərqərar olacaq.
Bu sözləri Axar.az-a açıqlamasında iqtisadçı alim Vüqar Bayramov deyib. Ekspert neftin gələcək dünya bazar qiyməti ilə bağlı konkret proqnoz verməkdən çəkinsə də, ümumi tendensiyanı belə proqnozlaşdırıb:
"Neft ilin sonuna 50 dollar intervalında bərqərar olacaq. Təbii ki, müəyyən azalma və artımlar istisna edilmir. Sözsüz ki, neftin qiymətinə təsir edəcək faktorlar var. Bunlardan biri OPEK-in qəbul edəcəyi qərardır. Əgər OPEK hasilatın dondurulması ilə bağlı qərar qəbul edərsə, bu, nəticə etibarilə neftin qiymətinin stabilləşməsinə və müəyyən artımlara gətirib çıxaracaq. OPEK-in yenidən razılıq əldə etməməsi isə bazarda hasilatla bağlı bir qeyri- müəyyənlik formalaşdıra bilər. Bu halda isə neftin qiymətində kəskin azalmalar müşahidə edilə bilər".
İqtisadçının sözlərinə görə, 2016-cı ilin növbəti aylarında neftin dünya bazar qiymətində kəskin artımlar gözlənilmir:
"Nəzərə alaq ki, qiymətlərə ABŞ-ın Federal Ehtiyatlar Sisteminin (FES) qərarı da təsir göstərir. Əgər növbəti dəfə uçot dərəcəsi artırılarsa, dollar möhkəmlənəcək. Bu isə neft ölkələri və neft bazarı üçün arzuolunan deyil. FES-in qərarı ilə yanaşı, OPEK-in mövqeyi çox önəmlidir. OPEK hasilatın dondurulması ilə bağlı anlaşma imzalayarsa, bu, bazarın stabilləşməsinə gətirib çıxara bilər".
Qeyd edək ki, sentyabrın 26-28-də Əlcəzairdə neft hasilatının "dondurulması" ilə bağlı Beynəlxalq enerji forumu keçiriləcək. Bundan öncə isə FES-in növbəti toplantısı gözlənilir. Bəzi FES rəhbərləri uçot dərəcəsinin artırılmasının tərəfdarıdır.
Tarix
2016.08.27 / 09:09
|
Müəllif
Aygün Yusibova
|