Ana səhifə İdman |
Bizim üçün bu, Avropada debüt oyunu oldu. Əslində, keçən il bu turnirə qatıla bilərdik. Amma feyr-pleylə bağlı oynaya bilmədik.
APA-nın məlumatına
görə, bunu "Dinamo"nun 19 yaşadək futbolçulardan ibarət
komandasının baş məşqçisi Sergey Çikişev deyib.
UEFA Gənclər Liqası turnirinin "Çempionlar yolu"nun I mərhələsində
"Qəbələ"nin qonağı olan Rusiya təmsilçisi səfərdə 2:0 hesablı
qələbə qazanaraq, cavab oyunu öncəsi böyük üstünlük əldə edib.
Matçdan sonra keçirilən mətbuat konfransında Çikişev fikrini bu
sözlərlə davam etdirib: "Bu il imkandan yararlana bilib turnirə
qatıldıq. Bu gün qalib gəlsək də, deməzdim ki, istədiyimiz kimi
çıxış etdik. Çalışacağıq Moskvada daha məzmunlu oyun sərgiləyək.
Səfərdə, adətən, səhvlər buraxılır. Amma bu dəfə səhv etmədiyimiz
üçün məmnunam. Sevinirəm ki, istədiyimiz nəticəni əldə etdik".
- "Dinamo" illərin komandasıdı. Təcrübə baxımından gənc
olan "Qəbələ" sizdə necə təəssürat yaratdı?
- Komandanızın oyununu bəyəndim. Onu da qeyd edim ki,
"Qəbələ"nin gözəl infrastrukturu var. Bu, güclü futbolçuların üzə
çıxmasına zəmin yaradacaq. Etiraf etmək istəyirəm ki, "Qəbələ"
Akademiyasının şəraiti bizimkindən qat-qat üstündü. Bizdə yeni
stadionun təmirinə start verilib. "Dinamo"nun əsas komandasının
stadionu tikildikdən sonra akademiyanın da təməli qoyulacaq.
- Sizin heyətinizdə Rusiya Premyer Liqasında oynamaq
gücündə olan futbolçular varmı?
- "Dinamo"nun əsas komandası ötən il Premyer Liqanı tərk etdi.
Bu, klubun tarixində ilk belə hadisə idi. Gənclərimiz isə ardıcıl
iki il çempion oldular. Məcbur olduq 12 oyunçumuzu əsas komandaya
verək. Mərkəz müdafiəçimiz Kalugin və iki hücumçumuz əsas komanda
ilə məşq edir. Onların üzlərini, demək olar ki, görmürəm. Əsas
komandamız Rusiyanın ikinci liqasında çıxış edir. Bu o deməkdi ki,
bizim ehtiyat komandamız olmadığından, 19 yaşlılarımız özlərindən
böyüklərə qarşı çıxış edirlər. Moskvada qalan oyunçularımız var ki,
onların yaşı bir qədər çoxdu. 4 futbolçumuz bu oyundan dərhal sonra
Belçikaya yollanacaq. Bu üzdən növbəti görüşü buraxacaqlar. Amma
"Qəbələ" ilə cavab matçına yetişəcəklər. Təxminən 8-9 oyunçumuz
milli komandalarda oynayır.
- 19 yaşlılarınızın özlərindən böyüklərlə oynaması onların
xeyrinədi, yoxsa ziyanına?
- Bu, bizim futbolçuların xeyrinədi. Çünki orda təcrübə qazanırlar. O təcrübədən sonra geriyə dönüb gənclərlə oynamağın mənası olmur. Bəzi mənfi cəhətlərinə baxmayaraq, bu amil futbolçularımızın xeyrinədi. Güclənirlər. Orda sərt oyun olsa da, bundan qaçmaq mümkün deyil.
Tarix
2016.09.21 / 21:43
|
Müəllif
Axar.az
|