Sentyabrın 21-22-də Rusiya Federasiyasının Həştərxan vilayətində Xəzəryanı ölkələr – Azərbaycan, Rusiya, İran, Türkmənistan və Qazaxıstanın fövqəladə hallar üzrə məsul qurumlarının iştirakı ilə Xəzər-2016 beynəlxalq kompleks təlim keçirilib.

Axar.az Fövqəladə Hallar Nazirliyinin (FHN) mətbuat xidmətinə istinadən xəbər verir ki, beynəlxalq kompleks təlimdə fövqəladə hallar nazirinin müavini, general-leytenant Etibar Mirzəyevin rəhbərliyi ilə nazirliyin "BE-200ÇS" tipli amfibiya təyyarəsi, "Vixr-9" yanğınsöndürən gəmisi və xilasedici dəstəsi texnogen qəzanın nəticələrinin aradan qaldırılması əməliyyatında uğurla iştirak edib.

Azərbaycan nümayəndə heyəti təlim çərçivəsində qərargahda yaradılmış videokonfransa və "Risklərin qlobal tendensiyaları və beynəlxalq əməkdaşlıq" mövzusunda keçirilmiş konfransa da qatılıb.