Q.Paşayeva Tovuzda müəllimlərlə görüşüb və gənclərin zərərli vərdişlərdən uzaq durması üçün səyləri daha da artırmağa çağırıb.

Axar.az xəbər verir ki, görüşdə müəllimlər çıxış edərək məktəbdə təhsilin vəziyyəti, qarşıda duran hədəflər barədə məlumat veriblər.

Qənirə Paşayeva bildirib ki, gənclər arasında zərərli vərdişlərə- narkomaniya, siqaretə, qumar oyunlarına aludə olan gənclərin artması hamımızı ciddi narahat etməlidir:

"Ona görə ailələrlə bərabər, bu məsələdə məktəblərimizin də üzərinə böyük məsuliyyət düşür. Məktəb təhsil verməklə yanaşı, vətəndaş da yetişdirir və müəllimlərimizdən xahiş edirik ki, gənclər arasında zərərli vərdişlərlə bağlı mütamədi söhbətlər aparsınlar. Belə hallara rast gəldikdə gec olmadan onlara dəstək olmağa çalışsınlar. Gənclərin lazımsız, mənasız, sadəcə, zamanlarını əllərindən alan vərdişlərdən uzaq durmaları, boş zamanlarını isə kitab oxumağa ayırmaları vacibdir. İnanıram ki, bu məsələlərdə əziz müəllimlərin səyləri daha da artacaq".