Mən məşhur Aşurbəyovlar ailəsinin üzvüyəm, Xəlil isə sadə salyanlı bir gənc idi.

Axar.az xəbər verir ki, bu sözləri xalq şairi Xəlil Rza Ulutürkün həyat yoldaşı Firəngiz Ulutürk "Bir sevgi tarixçəsi" verilişində danışarkən deyib.

O, ilk dəfə universitetdə tanış olduqlarını bildirib:

"Onda universitetdə oxuyurdum. Bacım məndən iki kurs yuxarı - Xəlillə bir qrupda idi. Bir gün Xəlil bacıma deyib ki, Firəngizdən xoşum gəlir. Sonra mənimlə görüşdü, dedi, ay qız, neynirsən tarix oxumağı, Marksı, Engelsi... Ədəbiyyat oxu, ədəbiyyat! Mən də dedim ki, atam istəyir, tarixçi olum. Mənim də xoşum gəlmişdi onun danışığından. Dedi, sənə elçi göndərəcəyəm. Atası gəlib atamın yanına, atam deyib ki, qoy, bir qızdan soruşum, anası ilə məsləhətləşim. Gəlib evdə deyəndə ki, bəs, qıza elçi gəlib, anam etiraz etdi, çünki o istəyirdi, həkim qohumu Cəmillə evlənim. Eyni anda bizə həm Cəmilin, həm də Xəlilin elçiləri gəldi. Amma mən iki ayağımı bir başmağa dayayıb dedim ki, Cəmilə ərə gedən deyiləm. Məcbur olub Cəmilgilə "yox" dedilər. Xəlilə razılıq verdilər və biz beləcə ailə qurduq".