Əgər hakimiyyətə gəlsəm, Böyük Britaniyaya Avropa Birliyinə dönməsi üçün yeni təkliflər verəcəyəm.

Axar.az xəbər verir ki, bunu Fransanın eks-prezidenti Nikola Sarkozi Parisdə iş adamları ilə görüşü zamanı söyləyib. O, prezident seçildikdən bir gün sonra Berlinə, daha sonra isə Londona uçacağını bildirib:

"Mən Berlində Merkelə Avropa Birliyinin yeni razılaşmasını verəcəyəm. Britaniyalılara isə deyəcəyəm ki, siz çıxmısınız, amma biz yeni razılaşmanı müzakirə edirik. Ona görə də sizin yenidən səs vermək haqqınız var. Bu dəfə söhbət köhnə yox, yeni Avropadan gedəcək. Mən Türkiyə ilə danışıqlar apardığımız müddətdə Avropanın ikinci böyük iqtisadiyyatının AB-dən uzaqlaşmasını qəbul edə bilmərəm. Burada şərt sadə olacaq: ya gedəcəksiniz, ya qalacaqsınız. Mənim təqdim edəcəyim yeni müqavilədə Şengen zonasının reformasiya edilməsi, Avropa Komissiyasının imkanlarının məhdudlaşdırılması, Türkiyənin AB-yə üzvlüyü ilə bağlı danışıqların dayandırılması əks olunacaq. Artıq Türkiyəyə onun yerinin Asiyada olduğunu demək vaxtı çatıb".