Pakistanın elektron KİV-lərin fəaliyyətini tənzimləyən orqanı (Pakistan Electronic Media Regulatory Authority, PEMRA) oktyabrın 1-də ölkədəki Hindistan informasiya kanallarının "qanunsuz" yayımını tam qadağan edən qərar verib.

Axar.az xəbər verir ki, oktyabrın 15-dən qüvvəyə minəcək qərara görə, qadağaya məhəl qoymayaraq yayımı davam etdirən kabel televiziya kompaniyalarına qarşı sərt tədbirlər görüləcək.

Bir müddət əvvəl Hindistanın ölkə ərazisindəki 7 rayona zərbələr endirməsi nəticəsində iki pakistanlı hərbçinin ölümünə cavab olaraq Pakistandakı kinoteatrlar hind filmlərini yayımlamaqdan imtina etdiyini bildirmişdi.

Qeyd edək ki, iki ölkə arasında gərginlik yaraqlıların Kəşmirdə yerləşən hərbi hissəyə hücumundan sonra artmağa başlayıb. Hadisə nəticəsində Hindistan ordusunun 18 hərbçisi həlak olmuşdu. "Nyu Deli" yaraqlıların Pakistan ərazisindən gəldiyini iddia etsə də, İslamabad insidentlə əlaqəsinin olmadığını bildirib.