Ana səhifə Gündəm |
Parlamentdə Qarabağa dair komissiyanın yaradılması ilə yanaşı, bu məsələ üzrə vitse-prezidentlik institutunun da təsis edilməsi problemin həlli istiqamətində mühüm töhfə verə bilər.
Bu barədə Axar.az-a açıqlamasında sabiq dövlət müşaviri Qabil Hüseynli danışıb. Politoloq bildirib ki, bu institut yaradılacağı təqdirdə təkcə Qarabağ problemin həlli ilə bağlı danışıqlar prosesini deyil, bu istiqamətdə bir sıra məsələləri tənzimləmə öhdəliyinə sahib olacaq:
"Bu vəzifə təsis edildikdə mümkündür ki, Qaçqınların və Məcburi Köçkünlərin İşləri üzrə Dövlət Komitəsi ilə birləşdirilsin. Düzdür, Qarabağ danışıqları üzrə əsas işləri xarici işlər naziri aparır, ancaq hansısa formada vitse-prezident də məsələlərin koordinasiya edilməsində, nizamlanmasında, yeni ideyaların ərsəyə gəlməsində iştirak etməlidir. Sözügedən vitse-prezidentlik institutu nizamlama ilə yanaşı, bu sahə ilə məşğul olan digər dövlət institutlarının fəaliyyətini də əlaqələndirməlidir. Qarabağ məsələsi hər zaman belə qalmayacaq. Böyük qüvvələr də çox yaxşı bilirlər ki, hazırkı durum çox davam edə bilməz. Odur ki, problemin həllindən sonra ərazilərimizdə iqtisadiyyatın yenidən qurulması, torpaqların bərpa edilməsi, doğma yurduna qayıdan insanlar üçün normal həyat şəraitinin yaradılması, dağıdılmış mədəniyyət abidələri və infrastrukturların bərpası, xüsusilə də işğal edilmiş ərazilərin dövriyyəyə qaytarılması bu qurumun qarşısında duracaq gələcək vəzifələrdəndir".
Tarix
2016.10.05 / 09:00
|
Müəllif
Aygün Yusibova
|