Başika və Duberdan bölgələrində Türkiyənin hərbi düşərgəsi İraq hökuməti və Müdafiə Nazirliyinin razılığı ilə qurulub.

Axar.az Xəbər 7-ə istinadən məlumat verir ki, bunu İraqın şimalında kürd muxtariyyəti hökumətinin sözçüsü Sefin Dizayi bildirib.

Onun sözlərinə görə, türk hərbçiləri terrorçu İŞİD qruplaşmasına qarşı mübarizə aparmaq üçün Mosul polisi və könüllü qüvvələrə təlim keçir:

"İŞİD hücumları artdıqdan sonra beynəlxalq koalisiya ilə birgə xeyli ölkə, Kürdüstan bölgəsinə və İraqa hərbi yardım, qüvvələrin təlim keçməsi sahəsində dəstək verdi. Bu çərçivədə İraq federal hökuməti və Müdafiə Nazirliyinin bilgisi və razılığı ilə Mosul şəhəri yaxınlığında Başika və Duberdan bölgələrində düşərgə yaradıldı. Türk hərbi mütəxəssislər hər iki düşərgədə Mosul polisi və könüllü qüvvələrə təlim keçməyə başladı".

Dizayi düşərgə qurulduqdan sonra İraq müdafiə nazirinin türk hərbçilərlə görüşdüyünü xatırladıb.

Qeyd edək ki, İraq Türkiyə qüvvələrinin Başikadan çıxarılmasını tələb edir. Türkiyənin Baş naziri Binəli Yıldırım isə bu gün verdiyi açıqlamada türk əsgərinin Başikadan çıxmayacağını bəyan edib.