Əli İnsanov uzun müddət indiki hakmiyyətdə nazir vəzifəsində çalışıb. Və bu gün onu mətbuatda müdafiə edən siyasiləri, yəni radikal müxalifətin nümayəndələrini nazir işlədiyi zamanlarda çox pis formada aşağlayıb, bəzi hallarda isə təhqir edib.

Bu sözləri Axar.az-a açıqlamasında BAXCP sədrinin müavini Niyaməddin Orduxanlı Əli İnsanovun siyasi məhbus obrazının yaradılmasına uğursuz cəhd göstərən radikal müxaliflərə cavab olaraq deyib. Onun sözlərinə görə, Əli İnsanovu radikal müxalifət hər zaman qatı korrupsioner, rüşvətxor məmur kimi xarakterizə edib:

"Tarixdən qaçmaq mümkün deyil. Əli İnsanovun nazir vəzifəsindən alındığı 2005-ci ilə qədər radikal müxalifətin mediadakı çıxışlarına, analizlərinə baxa bilərsiniz. Onlar birmənalı olaraq Əli İnsanovu cinayətkar adlandırıblar, külli miqdarda rüvşət almaqda, korrupsiyada suçlayıblar. Belə olan halda indi onun müdafiəsi istiqamətində deyilən sözlər uğursuz siyasi cəhdlər, manipulyasiyalardır".

N.Orduxanlı Ə.İnsanov barəsində oktyabrın 11-də çıxarılan növbəti həbs qətimkan tədbirinə də toxunub:

"Bu, Azərbaycanda ilk fakt deyil, bundan öncə də həbsdə olduğu müddətdə məhkumun etdiyi yeni cinayətə görə cinayət işinin qaldırıldığının dəfələrlə şahidi olmuşuq. Yəni bu, bütün dünyada normal hüquqi prosedurdur. Bu faktdan hansısa siyasi məqsədlər üçün istifadə etmək isə gülüncdür. Çünki Əli İnsanov hakimiyyət üçün qorxulu füqur deyil, onun cəmiyyət içində heç bir nüfuzu yoxdur. Həmişə öz kobudluğu ilə seçilən, efirdə jurnalistləri belə təhqir edən bir korrupsioner məmurun hər zaman təhqir etdiyi müxalif siyasilər tərəfindən müdafiə olunmasının özü bir daha təsdiqləyir ki, radikal müxalifət növbəti riyakarlığını edir".