Ana səhifə İdman |
Vacib qələbə qazandıq. İlk 2 oyunda qələbə qazana bilmədiyimiz səbəbindən oyunçularda həyəcan çox idi.
APA-nın məlumatına
görə, bu sözləri "Qarabağ"ın baş məşqçisi Qurban Qurbanov
deyib.
Avropa Liqasının qrup mərhələsinin III turu çərçivəsində PAOK-u
qəbul edən Ağdam klubu meydandan qələbə ilə ayrılıb – 2:0.
Matçdan sonra keçirilən mətbuat konfransında Qurbanov qələbəni şərh
edib: "Hamı matçın mahiyyətini anlayırdı. Bütün futbolçular
əllərindən gələni etdilər. Çox şükür ki, oyun düşündüyümüz kimi
alındı. Amma həddindən artıq ağır idi. Çünki yaxşı komandaya qarşı
oynayırdıq. Bilirdik ki, rəqib son görüşlərdə uduzmurdu. Amma bizim
üçün vacib onların statistikası yox, öz oyunumuz idi. Artıq
diqqətimizi səfər matçına yönəldəcəyik. Bir də ki, "Qəbələ"yə
uğurlar arzulayıram. Məni tez buraxsanız, gedib, "Qəbələ"nin
"Sent-Etyen"lə matçına baxacam".
- İkinci hissədə daha yaxşı oynadız. Fasilədə
yetirmələrinizə hansı tapşırıqları verdiniz?
- Onları burda deyə bilmərəm. Amma matçın gedişində kiçik
dəyişikliklər etdik. Ümumiyyətlə, hər komanda ilk hissədə düşündüyü
oyunu qura bilir. Birinci hissədə rəqib bizim futbolçulara qarşı
çox yaxın oynayırdı, bu da bizə çətinlik yaradırdı. Buna
baxmayaraq, fasiləyə kimi 3 real qol epizodu yaratdıq. Bizim üçün
vacib idi ki, düşündüyümüz oyun üslubunu sona qədər qoruyub
saxlayaq. Futbolçulara tapşırmışdım ki, az səhv buraxaq. Çünki PAOK
səhvlərdən maksimum istifadə etməyi bacaran komandadı. Düzdü,
səhvlər oldu, amma bu, futbolda qaçılmazdı.
- Gözlədiyiniz PAOK-u meydanda gördünüz?
- Tam düşündüyüm komanda idi. Sadəcə, bir neçə futbolçusu var
idi, onları oyundan kənarlaşdırmağa çalışırdıq. Ayrıca tapşırıq
vermişdik. Futbolda həmişə risk var. Mən həmişə demişəm ki,
əlimdəki futbolçularımın sayı nə qədər çox olsa, dəyişiklik etmək
bir o qədər asandı.
- Ehtiyatda mərkəz müdafiəçisi yox idi. Bu sizi narahat
etmirdi?
- İki variantımız var idi ki, risk edəcəyimiz halda, Maksim və
ya Qaranı o mövqedə oynada bilərdik. Pozitiv düşünmək lazımdı. Odu
ki, narahat olmadan, bu heyətə güvənmişdik.
- Reynaldo zədənməsəydi, Dino Ndlovu əsas heyətdə yer
alacaqdımı?
- Kim daha çox hazır idisə, onu da meydana buraxmalıydıq. Dino
öz üzərində daha çox çalışır. O, bu gün əsas heyətdə yer almağa
layiqdi.
- Qrupdakı hazırkı xal durumunu necə
dəyərləndirirsiz?
- Hər şey göz önündədi. PAOK kimi, bizim də 4 xalımız var. Ümumi
oyunlara baxsaq, üstünlük PAOK-dadı. Çünki həm bizi, həm də
"Slovan"ı öz meydanında qəbul edəcək. Biz isə 3 görüşdən ikisini
səfərdə keçirəcəyik.
- Mahir Mədətovun bugünkü oyunu ilə bağlı fikriniz
necədi?
- Mahirdən razı qaldım. Əlbəttə ki, təcrübəsi çatışmır. Onun o yaşıdı ki, az-az təcrübə toplasın. Deyə bilmərəm ki, Mahirdə hər şey idealdı. Perspektivi qabaqdadı. Bugünkü matçda irəlidə sürəti artırmaq lazım idi ki, Mədətov bunu bacardı.
Tarix
2016.10.21 / 00:27
|
Müəllif
Axar.az
|