Azərbaycanın öz torpaqlarını istənilən yolla azad etmək hüququnu bəyan etməsi hər dəfə beynəlxalq güclərin etirazı ilə qarşılanır.

Axar.az xəbər verir ki, bu sözləri Prezidentin ictimai-siyasi məsələlər üzrə köməkçisi Əli Həsənov Xəzərt TV-yə açıqlamasında deyib.

Dövlət rəsmisi postneft dövrünün islahatları ilə bağlı da mühüm açıqlamalar verib.

Əli Həsənov bildirib ki, müstəqilliyə qovuşduğu andan Azərbaycanın milli inkişafı yolunda rastlaşdığı ən mühüm problem Ermənistan-Azərbaycan, Dağlıq Qarabağ münaqişəsidir. Bu problem bütövlükdə regionun iqtisadi, siyasi tərəfdaşlıq mühitinə, sülhün və təhlükəsizliyin təmin olunmasına maneçilik törədən başlıca amildir. Azərbaycan münaqişənin beynəlxalq hüquqi prinsiplər çərçivəsində həlli üçün fəal siyasət aparsa da, Ermənistanın qeyri-konstruktiv mövqeyi buna mane olur.

Əli Həsənov deyib ki, Azərbaycan tərəfi dəfələrlə Dağlıq Qarabağda yaşayan ermənilərə yalnız Azərbaycanın ərazi bütövlüyü çərçivəsində hər hansı muxtariyyət statusu verilə biləcəyini bəyan edib.

Dövlət rəsmisi post-neft dövründə həyata keçirilən islahatlara toxunaraq bildirib ki, artıq həmin mərhələ başlayıb və ölkədə ciddi iqtisadi, siyasi islahat aparılır: "Bütün bunlar isə dayanaqlı iqtsaidi inkaşfın davamlılığını təmin edəcək".

Mövzu ilə bağlı daha ətraflı videomaterialı təqdim edirik: