İŞİD-in Kərkükə hücumu bir neçə gün öncədən məlum imiş.

Axar.az xəbər verir ki, oktyabrın 6-da İraq kəşfiyyatı Kərkükdəki təhlükəsizlik qüvvələrinə xəbərdarlıq məktubu göndərib. Məktubda İŞİD-in Mosulda müqavimət göstərməyəcəyi, Kərkükə hücum edəcəyi barədə informasiya yer alıb.

Bu məktubdan 3 gün sonra, oktyabrın 9-da İraqdakı ABŞ hərbçiləri toplantı keçirib. Peşmərgə qüvvələrinin də qatıldığı toplantıda İŞİD-in mümkün hücumu müzakirə edilib və Kərkükün müdafiəyə ehtiyacı olmadığı irəli sürülüb. ABŞ komandirləri "İŞİD Kərkükə hücum etməkdənsə, mübarizəni Mosulda davam etdirəcək", - deyib. Bununla da şəhər müdafiəsiz qalıb.

Toplantıdan 3 gün sonra İraq kəşfiyyatı Kərkükə növbəti dəfə xəbərdarlıq məktubu göndərib, terrorçuların hücuma hazırlaşdığını bildirib. Ancaq bu dəfə də kəşfiyyatın xəbərdarlığına məhəl qoyan olmayıb.