Ana səhifə İdman |
Avstriyanın Lints şəhərində karate üzrə 23-cü dünya çempionatı davam edir. İki ildən bir keçirilən dünya çempionatında ölkəmiz 16 karateçi ilə təmsil olunur.
Axar.az xəbər verir ki, oktyabrın 26-da yeddi Azərbaycan idmançısı çempionatda mübarizəyə başlayıb. Onlardan Ayxan Mamayev (84 kq) və Rafael Ağayev (75 kq) bütün rəqiblərini məğlub edərək, çempionatın final mərhələsinə yüksəlib. Ayxan Mamayev finalda yapon karateçisi Araqa Ryutaro, Rafael Ağayev isə misirli idmançı Abdel Rahman Omar ilə qarşılaşacaq. Çempionatın final mərhələsi oktyabrın 28-də baş tutacaq.
Oktyabrın 26-da tatamiyə çıxan digər idmançılarımız – fərdi kata yarışlarında döyüşən Roman Heydərov və Neda Rezai, eləcə də kumite yarışlarında İrina Zaretska (68 kq), Fəridə Abiyeva (61 kq) və Asiman Qurbanlı (84 kq-dan yuxarı) mübarizəni dayandırmalı olublar.
Oktyabrın 27-də isə çempionatda komanda yarışları keçiriləcək. Azərbaycan millisinin həm kişi, həm də qadın idmançıları komanda yarışlarında mübarizə aparacaqlar.
Dünya çempionatına oktyabrın 30-da yekun vurulacaq.
Tarix
2016.10.27 / 01:19
|
Müəllif
Axar.az
|