Siz heç vaxt rus ola bilməyəcəksiniz və artıq ukraynalı da ola bilməzsiniz.

"Axar.az" xəbər verir ki, bu sözləri Sevastopol Şəhər Sovetinin deputatı Vasili Zelençuk krımlılara müraciətində deyib.

Zelençuk bildirib ki, krımlılar maaşların, pensiyaların artırılmasını, Rusiya həddinə çatdırılmasını gözləyirdilər və buna görə də, referendumun nəticələrini sevinclə qarşıladılar: "Əvvəlcə sevinc həddi böyük idi. Nədənsə hamı sevincdən SSRİ-nin himnini oxuyurdu, Rusiyanın deyil. Bayramın sərxoş atmosferini maaş "dalğası" pozdu. Krımda maliyyə özbaşınalığı baş verir. Maaşları artırmadılar, sadəcə 1 rublu 3.8 qrivenə çatdırdılar. Əksər vətəndaşlar, o cümlədən analar yeni doğulmuş körpəyə görə sosial müavinətləri almırlar".

Deputat bildirib ki, yaxın günlərdə krımlıları kommunal xərclərin bahalaşması gözləyir: "İndi krımlılar suya, elektrik enerjisinə görə daha çox pul ödəyəcəklər".

Zelençukun sözlərinə görə, bundan sonra krımlıları psixoloji diskomfort gözləyir: "Siz heç vaxt rus ola bilməyəcəksiniz və artıq ukraynalı da ola bilməzsiniz. Siz iki dövlətin arasında yad bədənə çevriləcəksiniz. Ukraynalıların gözündə siz nifrət, rusların gözündə isə inamsızlıq, yazıqlıq oxuyacaqsınız".