Hökməli qəsəbəsində polis bölməsi yaradılır. Bunun üçün Hökməli qəsəbəsi At yalı yaşayış massivində yer də ayrılıb. Yer Hökməli bələdiyyə sədri Nemət Mirhadıyevə məxsus olduğu bildirilən "Vüsal" şadlıq sarayının yanında yerləşir.

Xəbəri Axar.az-a Abşeron rayon Polis şöbəsindən təsdiqləyiblər. Bildiriblər ki, Abşeron Polis Şöbəsinin Mehdiabaddakı polis bölməsindən sonra Hökməlidə də bölməsi yaradılacaq. Bölmə bina tikilib hazır olandan sonra fəaliyyətə başlayacaq. Şöbədən o da bildirilib ki, bölmə 30-40 nəfərlik heyətdən ibarət olacaq.

Ümumiyyətlə, Abşeron rayonunda fəaliyyət göstərəcək polis bölmələrinin sayı 4-ə çatdırılacaq. Mehdiabad və Hökməlidən sonra, Xırdalan şəhərində və Masazır qəsəbəsində də bölmələr olacaq. Xırdalan şəhərində fəaliyyət göstərəcək bölmənin bina yeri bir dəfə müəyyənləşdirilsə də, qərar dəyişib və bu səbəbdən hələlik nə Masazırda, nə də Xırdalan şəhər Polis bölmələrinin yeri məlumdur.

Abşeron rayon Polis şöbəsinin isə idarəyə çevriləcəyi nəzərdə tutulub.