12:12

Sülh və Demokratiya İnstitutunun direktoru Leyla Yunus həbs edilib.

Bu barədə məlumatı "Musavat.com"a hüquq müdafiəçisinin həyat yoldaşı Arif Yunus verib. Onun sözlərinə görə, Reportyorların Azadlığı və Təhlükəsizliyi İnstitutuna tədbirə gedərkən Leyla Yunusun olduğu avtomobil saxlanılıb və üç nəfər hüquq müdafiəçisini maşından düşürərək naməlum istiqamətdə aparıblar.

Xatırladaq ki, Leyla Yunus casusluq maddəsi ilə ittiham olunan jurnalist Rauf Mirqədirovun işi ilə bağlı təkrar ifadə verməkdən imtina etmişdi. Onun məcburi qaydada ifadə verməyə aparıldığı istisna deyil.

Qeyd edək ki, Baş Prokurorluğun məsələ ilə bağlı rəsmi açıqlama verəcəyi gözlənilir.

18:15

Bu dəqiqələrdə Leyla Yunusu Baş Prokurorluğun binasından çıxararaq naməlum istiqamətə aparıblar. Musavat.com-un hadisə yerində olan əməkdaşı Cavanşir Abbaslının dediyinə görə, L.Yunusu iki cip növlü maşında aparıblar. Jurnalistlər avtomobillərin ardınca düşsələr də, çata bilməyiblər. Bununla belə, əməkdaşımız öyrənib ki, L.Yunusa qarşı CM-nin 274 (dövlətə xəyanət), 178 və 213-cü maddələri (vergidən yayınma) ilə cinayət işi açmaq və barəsində iki aylıq həbs qətimkan tədbiri seçmək üçün Nəsimi rayon Məhkəməsinə aparıblar.

20:30

Nəsimi Rayon Məhkəməsinin qərarı ilə, Leyla Yunus barəsində 3 aylıq həbs qətimkan tədbiri seçilib.