Çeçenistan Respublikasının rəhbəri Ramzan Kadırov telefonunun itməsindən sonra minlərlə insanın istintaqa çağırılması ilə bağlı yayılan xəbərlərin yalan olduğunu deyib.

Axar.az xəbər verir ki, Kadırov bu barədə özünün İnstaqram səhifəsində yazıb.

"Çeçenistanda baş verənlər dünya mətbuatının gündəmindədir. Hansısa hüquq-müdafiə təşkilatının məlumatına əsasən bu barədə yüzlərlə mətbu orqan yazır. Dünyanın hər tərəfindən jurnalistlər Qroznıya zəng edirlər. Hamı maraqlanır ki, Kadırovun telefonu hansı vəziyyətdərir. Deyirlər ki, guya mən itmiş telefonuma görə, minlərlə insanı istintaqa çağırtdırmışam. Demək istəyirəm ki, bu, həyasızcasına ortaya atılmış yalandır", - Kadırov bildirib.

Kadırovun sözlərinə görə, Şira Yurtda muzey açılışı zamanı həqiqətən də mobil telefon itib, amma bu telefon "Niysarxoy" ansamblının rəhbəri Xedi Çakayevə məxsus olub: Şalin polis rəhbərliyinin həyata keçirdiyi tədbirlər nəticəsində Xedinin telefonu tapıldı. Mənə məlum deyil ki, orada nə qədər adam dindirilib. Əgər min, on min nəfər dindirilibsə, bu o deməkdir ki, hüquq-mühafizə orqanları işləyir və adi faktı belə diqqətsiz qoymurlar. Mənim telefonuma gəlincə isə, hər ikisi yanımdadır və itməyə də hazırlaşmırlar".