Ana səhifə İdman |
"Məncə, bu oyunda qol çatışmadı. Müdafiədə oynamağımızdan daha çox razı qaldım". Apasport.az saytının məlumatına görə, bunu "Qarabağ"ın baş məşqçisi Qurban Qurbanov deyib.
Bu gün Avroliqanın F qrupunda "Qarabağ" "Sent-Etyen"lə
qarşılaşıb. Görüş qolsuz heç-heçə ilə başa çatıb.
Oyundan sonra keçirilən mətbuat konfransında Qurbanov bunları
deyib: "Çalışacağıq ki, hər oyunda yaxşı çıxış edək.
Azarkeşlərimizə "çox sağ olun" deyirəm. Belə azarkeş olanda
millətimizin birliyi hiss olunur. Böyük bayrağımızın stadionda
əllərdə gəzdirilməsi yaxşı görüntü idi. Rəqib əks-hücumları daha
çox mərkəzdən başlayırdı. Reynaldo daha çox müdafiədə də bizə kömək
edirdi".
Qurbanov futbolçularından razı qaldığını bildirib: "Hər bir
qazandığımız xal bizim xeyrimizədir. Oyundan əvvəl də demişdim ki,
əsas yaxşı oyun göstərməkdir. Belə davam etsək, 3 xal da gələcək. 1
xala da şükür etməliyik. Amma bu 1 xalı da çox şişirtmək lazım
deyil. Komandanın oyunundan və ayrılıqda futbolçuların hər birindən
razı qaldım. Fransa klubu ilə oynamamışdıq. İndi onların da nəyə
qadir olduğunu öyrəndik. Mən bu rəqibi ciddiyə alırdım. Komandanın
müdafiəsini daha irəlidən qurmağı tapşırmışdım. Mənim üçün çox
vacib idi ki, top itirən zaman müdafiə oluna bilək. Rəşad Sadıqovun
oyununda eniş var. Amma onun tədricən öz formasını qaytara
biləcəyini düşünürəm".
Qurbanov Kristof Qaltyenin onları tərifləməsinə də münasibət
bildirməyi unutmayıb: "Həmkarımın bizə dair xoş sözlərinə görə
təşəkkürümü bildirirəm. Biz pillə-pillə irəliləyirik. Oyundan oyuna
çalışırıq ki, işimizi daha düzgün qurub nöqsanları aradan qaldıraq.
Həmişə bu yöndə inamla mübarizə aparırıq. Vüqar Nadirovun oyunundan
razı qaldım. Onun 2 dəfə mövqeyini dəyişdirdim. Əvvəl hücumda, daha
sonra yarımmüdafiənin sağında oynatdım. Düşünürəm ki, Çumbinyonun
zədəsi ciddidir. Müayinədən sonra bunu dəqiq biləcəyik. Muarem
Muaremin zədəsi isə o qədər də ciddi deyil. Maksim Medvedevin
oyunundan da razı qaldım".
Tarix
2014.09.19 / 01:39
|
Müəllif
Axar.az
|