"Əlbəttə ki, "İnter"lə bizi necə oyun gözlədiyini bilirik. Ancaq indidən bu haqda çox da düşünmürük. Hazırda əsas planımız, məqsədimiz "Neftçi"yə qalib gəlməkdir. Çünki qələbə qazansaq, "İnter"lə oyuna da yaxşı motivasiya olarıq".

Axar.az-ın məlumatına görə, bu sözləri "Qarabağ"ın qol silahı Vüqar Nadirov deyib.

Hücumçu "Qol.az"a bildirib ki, çempionatdakı oyuna da Avroliqa qədər əhəmiyyət verilir.

Turun mərkəzi qarşılaşması olan "Neftçi" - "Qarabağ" matçı sentyabrın 27-si saat 16:00-da başlayacaq. PFL-in mətbuat və ictimaiyyətlə əlaqələr departamentinin rəhbəri Aslan Şahgəldiyev bildirib ki, "Neftçi" - "Qarabağ" və "Qəbələ" - "Xəzər Lənkəran" matçları "İdman Azərbaycan" telekanalında göstəriləcək.