Mustafa Kamal Atatürkün dünyaya gəldiyi Selanik şəhərindən maraqlı təklif gəlib.

Axar.az xəbər verir ki, şəhərin bələdiyyə rəhbəri Yannis Butaris Serbiya-Albaniya matçının Selanikdə keçirilməsini təklif edib. Butaris Selaniki sülh şəhəri adlandıraraq qalmaqallı keçən matçın Yunanıstanda oynanılmasının məqsədə uyğun olduğunu deyib.

Butaris UEFA-ya məsələ ilə bağlı hər hansı bir müraciət etmədiklərini bildirərək Selanikdə xalqların bir-birinə düşmən olmadıqlarını, sülh içərisində birlikdə yaşadığı bir şəhər olduğunu qeyd edib.

Xatırladaq ki, Avro-2016-nın seçmə mərhələsi çərçivəsində keçirilən Serbiya - Albaniya oyunu yarımçıq dayandırılıb. Buna səbəb azarkeşlərin hərəkəti olub. İlk hissənin sonlarında Albaniyanın bayrağını uçurublar. Meydan sahiblərinin müdafiəçisi Stefan Mitroviç tullanaraq bayrağı yerə salıb. Bundan sonra komandaların futbolçuları arasında mübahisə yaranıb. Serbiyalı azarkeşlər fayerlər yandıraraq meydana atıblar. Nəticədə görüş qeyri-müəyyən müddətə dayandırılıb.