Ana səhifə Gündəm |
"Qaz ixracı məsələsində Azərbaycanın öz maraqları var və bu Rusiyanın maraqları ilə müəyyən məqamlarda ziddiyət təşkil edir".
Bu sözləri Axar.az-a açıqlamasında politoloq Ərəstun Oruclu söyləyib. O, Rusiyanın Azərbaycan qazının Avropaya çıxarılmasında maraqlı olmadığını bildirib:
"Avropa enerji diversifikasiya siyasətində, enerji asılılığının aradan qaldırılmasında əsas partnyorlardan biri kimi Azərbaycanı götür. Bu istiqamətdə müəyyən işlər gedir. İndi İran qazının da Avropaya çıxarılması məsələsi gündəmə gəlir. Digər ölkələrin də buraya qoşulması mümkündür. Transxəzər məsələsi aktuallaşır. Bu günlərdə Rusiya onunla bağlı bəyanat verdi. Bu məqamlara baxanda, SOCAR-ın vitse-prezidenti Elşad Nəsirovun açıqlaması tamamilə anlaşılandır. Çünki Azərbaycan qazının və bizim qaz paylayıcı şəbəkəsinə qoşulacaq ölkələrin qarşısını almağın metodlarından biri də budur. Onların bunun üçün elə İtaliyanın özündə də müəyyən qrupları var. Əgər Elşad Nəsirov belə bəyanat verirsə, deməli, bunun üçün çox ciddi əsaslar var. Rusiya Azərbaycanın maraqlarını bütün vasitələrlə blok etməyə çalışır. Bir də Xəzərin statusu məsələsi var.
Hesab edirəm ki, iqtisadi maraqlarda ziddiyət var və həmişə olacaqdır. Çünki hər iki ölkə qaz ixrac edir. Onlardan biri Avropada qaz payının 38-40%-nə sahibdir, digəri isə öz qazı və qonşu dövlətlərin enerji ehtiyatlarını Avropaya nəql etməkdə maraqlıdır. Bu, maraqların toqquşmasıdır. Azərbaycan tərəfindən də Rusiya ilə münasibətlərdə istiləşməyə rəğmən bu cür açıqlama verilməsi normaldır. Çünki hər bir dövlətin özünün maraqları var".
Qeyd edək ki, SOCAR-ın vitse-prezidenti Elşad Nəsirov İtaliyanın "L'Espresso" qəzetinə müsahibəsində Azərbaycanın Avropaya qaz ixracı məsələsində "Qazprom"la maraqlarının toqquşduğunu bildirmişdi. O, Avropada Bakıya qarşı qaralama kompaniyasının arxasında Rusiyanın dayandığını söyləmişdi.
Tarix
2014.10.23 / 08:30
|
Müəllif
İlkin Həsənov
|