"Volksvagen" markalı "Polo Sedan" və "Tiguan" modelli avtomobillərin reklamlarında aldadıcı məlumatlar aşkar edilib.

İqtisadiyyat və Sənaye Nazirliyindən Axar.az-a verilən məlumata görə, nazirlik yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti reklam bazarında araşdırmaları davam etdirir.

Reklam bazarında aparılmış araşdırmalar zamanı "Volksvagen" markalı "Polo Sedan" və "Tiguan" modelli avtomobillərin reklamlarında istehlakçıların çaşdırılmasına səbəb olan qeyri-dəqiqlik əlamətləri müəyyən edilib. Həmin reklamlarda "Volksvagen" markalı "Polo Sedan" və "Tiguan" modelli avtomobillərin digər avtomobil markalarından üstünlüyü fikrini yaradan "Polo Sedan – gündəlik ehtiyaclarınızın ən ideal həlli" və "Tiguan – yolda və yolsuzluqda ən etibarlı dostunuz" məzmunlu ifadələrdən istifadə edildiyi müəyyən olunub.

Bununla əlaqədar həmin avtomobillərin satışını həyata keçirən "Avro Stil" ("Euro Style") LTD" MMC barəsində antiinhisar qanunvericiliyinin tələblərinin pozulması əlamətləri üzrə iş qaldırılıb.

Araşdırmalar davam etdirilir.

Xatırladaq ki, bir neçə gün öncə İqtisadiyyat və Sənaye Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti "Audi" Mərkəzi ilə bağlı araşdırma aparmışdı.