Azərbaycanda avtomobillərin pərdə və plyonka ilə idarə edilməsinə noyabrın 15-də qadağa qoyulacaq.

Baş Dövlət Yol Polisi İdarəsinin mətbuat xidmətinin rəhbəri Kamran Əliyevin Ans press-ə verdiyi məlumata görə, standarta uyğun olaraq, gələn ayın 15-də maşınlarda gündən qoruyan vasitələrdən istifadəyə icazə verilməyəcək.

"Düşünürəm ki, sürücülər qayda-qanunlara əməl edəcəklər. Artıq günəşli hava olmadığı üçün indidən sürücülər maşınlarındakı plyonka və pərdələri yığışdıra bilərlər", - deyə Kamran Əliyev bildirib.

Qurum rəsmisi deyib ki, noyabrın 15-dən sonra hansısa maşında plyonka və pərdə aşkarlanarsa ciddi tədbir görüləcək.

Qeyd edək ki, Standarlaşdırma, Metrologiya və Patent üzrə Dövlət Komitəsinin verdiyi qərar əsasında, Azərbaycan Respublikasının iqlim şəraiti nəzərə alınaraq, bu ildən etibarən hər il 1 may tarixindən 15 noyabr tarixinədək avtomobillərdə sənaye üsulu ilə hazırlanan jalüzlərin istifadəsinə icazə verilib.