"Həmsədr ölkələr ilk gündən belə bir siyasi xətt seçiblər ki, bu münaqişə nəzarət altında qalmalıdır və qalacaq da".

Bu sözləri Axar.az-a açıqlamasında politoloq Fikrət Sadıqov Soçi, Uels və Paris kimi önəmli görüşlərdən sonra Ermənistanda həyata keçirilən hərbi təlimlərə aydınlıq gətirərkən deyib.

Politoloqun sözlərinə görə, bu üç ölkə indi bütün imkanlardan maksimum istifadə edir ki, bu münaqişə nəzarət altından çıxmasın:

"ABŞ, Fransa və Rusiyanın nəzarət etmək funksiyasi heç də o demək deyil ki, onlar Azərbaycanın işğal olunmuş torpaqlarının azad olunmasının tərəfdarıdır. Bu ölkələr nəzarəti ona görə əllərində saxlamaq istəyirlər ki, münaqişə əsla başlamasın və Azərbaycan olaraq biz öz torpaqlarımızı azad etməyək, eyni zamanda belə bir vəziyyət isə davam etsin. Çünki vəziyyət davam edərsə, aparıcı dövlətlərin regionda prosesə nəzarəti daha da asanlaşar. Ona görə də dəfələrlə bizi konflikt tərəflə bir tərəziyə qoyaraq tamamilə əsassız, subyektiv, ədalətdən uzaq bəyanatlar səsləndirirlər. Həqiqəti nəinki nəzərə almır, heç dillərinə belə gətirmirlər. Bir dövlət nəinki başqa bir dövlətin ərazisini işğal edir, onun torpaqlarında hərbi təlim keçirir və biz bununla bağlı heç bir kəlmə söz belə eşitmirik. Əvəzində isə ikili mövqe göstərirlər. Bu ölkələrin seyrçiliyi, ikiüzlülüyü və riyakarlığı Dağlıq Qarabağ münaqişəsinin 20 ildən artıqdır ki, həll olunmamasının yeganə və tək səbəbidir".