Sabah "Qarabağ" Avropa Liqasında son səfər matçına çıxır. Ağdam təmsilçisi Fransada "Sent-Etyen"lə görüşdən qalib ayrılsa, qrup mərhələsindən növbəti tura keçmək üçün böyük şans yaranır.

Axar.az-ın məlumatına görə, Qurban Qurbanovun yetirmələri Bakıda məğlub edə bilmədiyi "Sent-Etyen"ə səfərdə qalib gəlməsə, şanslar minimuma enəcək. Amma "Qarabağ" səfər oyunlarında daha yaxşı təsir bağışlayır.

Fransada uduzacaq komanda 1/16 final şansları ilə rəsmən vidalaşacaq. Məğlubiyyət isə "Qarabağ" üçün "İnter"lə matçı formallığa çevirəcək. Çünki Fransadan xalsız qayıdacağı halda Ağdam klubu 2-ci olmaq şansını itirəcək.

Komandamız bu oyuna Reynaldosuz çıxacaq ki, bu da "Qarabağ" üçün böyük itkidir. Amma rəqib də ciddi itkilərlə meydana çıxacaq. Bunlar Allen Sen-Maksimin və Mövlud Ərdinçdir. Hər iki futbolçunun "Qarabağ"a qarşı oynamayacağı dəqiqləşib.