Dekabrın 12-də Heydər Əliyevin anım günü şadyanalıq edib, diskotekaya ara verilməyən və nəticədə ictimai qınağa səbəb olan, polisin müdaxiləsi ilə əxlaqsızlıq yuvası olub-olmadığı araşdırılan "İnfiniti" gecə klubu hələ də fəaliyyətini bərpa etməyib.

Axar.az əməkdaşı gecə vaxtı, barların aktiv fəaliyyət göstərdiyi məqamda "İnfiniti"nin qapısının bağlandığını və ətrafda heç kimin olmadığını müşahidə edib.

Ətrafda yaşayan insanların sözlərinə görə, artıq "İnfiniti" gecə klubu 5 gündür ki, işləmir.

Nəsimi Rayon Polis İdarəsindən Axar.az-a verilən məlumatda "İnfiniti" barının əxlaqsızlıq yuvası kimi fəaliyyət göstərməsi barədə daxil olan məlumatın araşdırıldığı bildirilmişdi.

Qeyd edək ki, dekabrın 12-də Heydər Əliyevin anım günü "İnfiniti" gecə klubunda əyləncə təşkil olunaraq, yüksək tonla musiqi səsləndirilib. Ərazidə olan polis əməkdaşları bunun sayğısızlıq olduğunu deyərək musiqinin dayandırılmasını tələb edib. Ancaq "İnfiniti" klubunun rəhbərliyi polisin tələbinə əhəmiyyət verməyib. Bundan sonra əraziyə Nəsimi Rayon Polis İdarəsinin əməkdaşları gələrək sayğısızlıq edən klubda araşdırmalara başlayıblar.

"İnfiniti" gecə klubunun əxlaqsızlıq yuvası olduğu barədə isə uzun müddətdir mediada xəbərlər gedir.