İmişli rayon sakini qanunsuz ov edərkən əlindəki ov tüfəngi ilə ehtiyatsızlıqdan yoldaşını öldürüb.

Axar.az xəbər verir ki, hadisə dünən səhər saat 5-6 radələrində İmişli rayonunun Məmmədli kəndi ilə Şərbətqobu Ovçuluq Təsərrüfatının arasında yerləşən su ərazisində baş verib.

Bakı şəhər sakini Akif Məmmədov və kənd sakini Hamlet Allahverdiyev brakonyerliklə məşğul olarkən A.Məmmədovun əlindəki ov tüfəngindən açılmış atəş nəticəsində H.Allahverdiyev dünyasını dəyişib. İlkin ehtimala görə, hadisə ehtiyatsızlıq səbəbindən baş verib. Hadisə ilə bağlı Şərbətqobu Ovçuluq təsərrüfatının işçiləri rayon polis şöbəsinə məlumat verib. Hazırda hadisənin baş vermə səbəbi ilə əlaqədar araşdırma aparılır.

Araşdırma zamanı A.Məmmədova "Azərovçu" Cəmiyyəti tərəfindən 2009-cu ildə qanunsuz ov bileti verildiyi məlum olub.