Nigeriyanın şimal-şərqində Boko Haram terror təşkilatının qorxusundan qaçıb evlərini tərk edənlərin sayı 850 mini keçib.

Axar.az Anadolu Agentliyinə istinadən xəbər verir ki, Milli Fövqəladə Hallar Rəhbərliyi Agentliyi (NƏMƏ) koordinatorlarından Əbdülsəlam Məhəmməd Laqosda təşkil etdiyi mətbuat konfransında belə deyib:

"Evlərindən çıxanların bir hissəsi düşərgələrə, bir hissəsi də qonşu kəndlərə sığındığı üçün saylarını dəqiq bilmək çətindir. 31 düşərgədə 850 mindən çox insan var. Bu düşərgələrdən 20-si şimal-şərq əyalətlərində yerləşir. Köçkünlərin sayını müəyyənləşdirmək üçün işlər aparırıq".

Əbdülsəlam Məhəmməd açıqlamasına bunları da əlavə edib: "Kano, Abuja, Platiu və Nasarava əyalətlərinə qaçanları qurduğumuz düşərgələrdə bir yerə yığırıq. Beləcə həm saylarını, həm də ehtiyaclarını müəyyənləşdirəcəyik".

Ötən həftə verilən açıqlamaya görə, Boko Haram təşkilatının olduğu şimal-şərq əyalətlərində 1 milyondan çox adam evindən çıxıb.

Təxminən 160 milyon əhalisi olan Afrikanın ən böyük ölkəsi Nigeriyanın şimalında fəaliyyət göstərən Boko Haram terror qruplaşması keçən ay bəzi şəhərləri öz idarəsi altına alaraq həmin bölgələrdə "xəlifəlik" elan edib.