"Lukoyl"un Rumıniyadan çıxarılması gələn il reallaşdırıla bilər.

Axar.az xəbər verir ki, bu iddia ilə Rumıniyanın "bbw.ro" saytı çıxış edib.

Mətbuat bunun "Lukoyl"un Rumıniyadakı himayədarı hesab olunan Viktor Pontanın öz vəzifəsini itirməsilə əlaqələndirib. Lakin mətbuat "Lukoyl"un ölkədən çıxarılmasının digər bir səbəbi kimi Qərblə Rusiya arasında olan qarşıdurmanı göstərib. Belə ki, NATO üzvü olan Rumıniyaya Qərbdən, xüsusilə, Vaşinqtondan böyük təzyiqlər var. ABŞ bununla Kremlin əsas dayaqları olan oliqarxları zəiflətmək və Putinlə milyarderlər arasında uçurum yaratmaq istəyir. Mətbuat hələlik Buxarestin Moskva ilə tam qarşı-qarşıya qalmamaq üçün qərar verməkdə çətinlik çəkdiyini bildirib.

Qeyd edək ki, "Lukoyl"un Rumıniyadakı neft emalı zavodu bu ilin oktyabrında Prezident Trayan Baseskunun vasitəçiliyi ilə qapadılmışdı. Lakin sonradan aparılan danışıqlar nəticəsində zavodun fəaliyyətinin bərpasına icazə verildi. Bundan öncə Rumıniya mətbuatı Pontanın məğlub olacağı təqdirdə Vahid Ələkbərovun şirkətinin Rumıniyada vergidən yayınma və digər maddələrlə ittiham olunacağını və neft emalı zavodunun bağlanacağını yazmışdı.