Rusiya Prezidenti Vladimir Putin Kremldə təşkil olunan Federal Təhlükəsizlik Xidmətinin (FSB) ildönümü münasibəti ilə təşkil olunan mərasimdə çıxış edib.

Axar.az xəbər verir ki, Rusiyanın gözünün qorxudulmasının mümkün olmadığını deyən Putin qlobal vəziyyətin sabitlikdən xeyli uzaqda olduğunu bildirib:

"Təhdid və risklər davamlı olaraq artır. Beynəlxalq hüququ sayan yoxdur. Bütün ölkələrdə nəzarəti ələ keçirmək üçün şantaj, təxribat, iqtisadi və informasiya təzyiqlərindən istifadə edilir. Krım və Sevastopolun Rusiyaya birləşdirilməsi üçün bizim əvəz ödəməyimizi tələb edirlər. Bunu hamı bilir ki, heç kim bizi qorxuda bilməz. Rusiyanı heç kim təcrid edə bilməz. Heç kim bunu edə bilmədi və edə bilməyəcək də".

Əsrlər boyunca bunun təkrarlandığını, təkcə 20-ci əsrdə bir neçə dəfə təcrübədən keçirildiyini deyən Putin ölkəsinin ram edilməsinin heç vaxt mümkün olmayacağını bəyan edib:

"Biz bir qisim çətinliklərə hazır olmaq məcburiyyətindəyik. Suverenliyimizə, azadlığımıza və birliyimizə yönələcək təhdidlərə qarşı uyğun cavabı verəcəyik".