Bu həftə də ölkə amansız qətllər və dəhşətli cinayət hadisələri ilə yaddaşa köçdü.

Axar.az krimxronikanı təqdim edərək xəbər verir ki, Gəncədə 2 ay əvvəl törədilmiş qətl hadisəsinin üstünün açılması hamını heyrətə saldı. Dekabrın 19-da 1963-cü il təvəllüdlü İsmayılov Vidalət Təbriz oğlu Gəncə polisinə gələrək təslim oldu.

O, nikahdan kənar yaşadığı, 1985-ci il təvəllüdlü Əliyeva Esmira Bağban qızını təxminən 50 gün əvvəl yaşadıqları mənzildə şəxsi münasibətlərin pozulması zəminində şal ilə boğaraq qəsdən öldürdüyünü etiraf etdi. Qatil daha sonra Göygöl rayonunun Totanlı kəndində yerləşən özünə məxsus evin həyətində xanımını basdırdığını bildirdi.

Şəhər prokurorluğunun əməkdaşları və polisin hadisə yerinin müayinəsi zamanı E.Əliyevanın meyiti basdırıldığı yerdən çıxarıldı. V.İsmayılov şübhəli şəxs qismində tutularaq istintaqa cəlb edildi.

***

Bu həftə Bakının Binəqədi rayonunda, "Gəncə" kafesinin qarşısında 55 yaşlı kişi oğlu yaşında gənci qətlə yetirdi. Aralarında yaranan mübahisə nəticəsində 55 yaşlı Bərxudar Çərkəz oğlu Yusifov 33 yaşlı Nurlan Vaqif oğlu Ağayevi boyun nahiyəsindən bıçaqlayaraq öldürməsi təsbit edildi və qonşusunu öldürən şəxs hadisə yerindən qaçsa da, polislər onu yaxalaya bildi.


***

Paytaxtda ərin arvadını öldürməsi bu həftə də əskik olmadı. Suraxanı rayon sakini, 43 yaşlı Mömünə Çerpanovanın həyat yoldaşı tərəfindən döyülməsi, ərinin ona balta ilə xəsarət yetirməsi müəyyənləşdi.

Bakıdakı orta məktəbdə də qan töküldü. Xətai rayonu ərazisində yerləşən 261 saylı orta məktəbin həyətində 27 yaşlı Kamran Xəlilov bıçaqlandı.

Polis K.Xəlilovu bıçaqlayan şəxsi axtarır…