Ana səhifə Toplum |
Rusiyada hökm sürən iqtisadi böhran bu ölkədə yaşayan
soydaşlarımızın Azərbaycana qayıtmasına rəvac verib.
Axar.az xəbər verir ki, qeyri-rəsmi rəqəmlərə görə, Rusiyada
çalışan 2,5-3 milyona yaxın azərbaycanlının ölkəyə qayıtma ehtimalı
var. Bu ilin əvvəllərində Kreml rəhbəri Vladimir Putinin ölkə
vətəndaşlığı almaq üçün şərtləri sadələşdirməsi də deyəsən
vəziyyətə təsir etməyib. Həmvətənlərimizin kütləvi şəkildə ölkəyə
dönmə qərarı paytaxtda, əsasən də bölgələrdə əlavə problemləri
labüd edir.
Rus rublunun kəskin dərəcədə ucuzlaşması ölkəyə göndərilən kapital
axınına da təsir göstərməkdədir. Bildirək ki, rəsmi məlumatlara
görə, Rusiyada çalışan şəxslər il ərzində ən azı 1,5 milyard dollar
həcmində vəsaiti bank vasitəsilə Azərbaycandakı ailələrinə
göndərir. Nəzərə alsaq ki, Rusiyaya qazanc dalınca gedən
vətəndaşların böyük bir hissəsi regionların payına düşür, onlar
qayıtdıqdan sonra ölkədəki vəziyyəti analiz etmək o qədər də çətin
deyil.
İqtisadçı ekspertlər də Rusiya iqtisadiyyatında böhranın davam
edəcəyi təqdirdə soydaşlarımızın kütləvi halda ölkəyə dönməsini
istisna etmir.
İqtisadi ekspert Samir Əliyevin sözlərinə görə, ilk vaxtlarda
çətinlik sezilməsə də, 4-5 aydan sonra bölgələrdə işsizlər ordusu
yarana bilər:
"Ölkəyə qayıdanlar orada qazandıqları vəsait hesabına müəyyən
müddət dolanacaqlar. Kimi əlindəki pulla burada ev alıb kirayə
verəcək, kimisi ailəsini dolandıracaq. Bu baxımdan, ilk zamanlarda
ciddi narahatlıq olmayacaq. Ancaq 4-5 ay sonra onların büdcəsində
problem başlayacaq. Gəlirin olmaması sosial baxımdan çətin vəziyyət
yarada bilər".
Hökumət də artıq soydaşlarımızı qarşılamq üçün müəyyən tədbirlər
görmək niyyətindədir. Bir müddət öncə Milli Məclisin deputatı Vahid
Əhmədov Rusiyada müvəqqəti yaşayan soydaşlarımızın geri qayıtma
ehtimalına hazırlaşmağı və fondlar yaratmağı təklif etdi. Bu
fondlarla geri qayıdanlara yeni iş yerlərinin açılmasında dəstək
vermək nəzərdə tutulur.
Tarix
2014.12.21 / 10:00
|
Müəllif
Şəmsəddin Ənsar
|