Ukraynanın Səhiyyə naziri təyin edilmiş sabiq Gürcüstanın keçmiş Əmək, Səhiyyə və Sosial Müdafiəsi naziri Aleksandr Kvitaşvili yeni vəzifəsindən narazıdır.

Axar.az xəbər verir ki, Kvitaşvili öz komandasını formalaşdırmağa imkan verilmədiyini bildirib.

Kvitaşvili istefa vermə ehtimalının olduğunu qeyd edib:

"İstənilən məsələnin icrası üçün iki şey lazımdır: Birinci - proqrama malik olmaq, ikinci - komandaya malik olmaq. Proqram var, ancaq komandanın formalaşdırılmasına imkan vermirlər. Komandanın formalaşdırılması mənim səlahiyyətim çərçivəsində deyil. Əgər maneə törədəcəklərsə, postumu tərk edəcəm".

Kvitaşvili qeyd edib ki, komandasını yaratmayıb, bu, uzun müddətli prosesdir, son dərəcə dəqiq insanları seçmək lazımdır.

Qeyd edək ki, 2 dekabrda Ukraynanın Səhiyyə naziri təyin edilmiş Aleksandr Kvitaşvili rüşvətxorlarla mübarizə aparacağını, nazirliyin strukturunu dəyişdirəcəyini və 2015-ci ilin sonuna kimi tibbi sığortanı həll edəcəyini bildirmişdi.

Xatırladaq ki, Ukraynada xarici ölkə vətəndaşlarından nazir və müavinlər təyin olunub. Poroşenkonun dekabrda verdiyi sərəncamla gürcü Kvitaşvili ilə bərabər, ABŞ Dövlət Departamentinin keçmiş əməkdaşı Natalya Yaresko Maliyyə naziri, litvalı biznesmen Ayvaras Abromaviçus İqtisadiyyat naziri, Gürcüstanın Daxili İşlər naziri olmuş Yekaterina Zquladze isə Ukraynanın Daxili İşlər nazirinin birinci müavini təyin ediliblər.