"Hər hansı bir işçi işdən azad olunanda ona müqavilə təklif olunmalıdır. Əgər razılıq olsa, onunla dərhal müqavilə əsasında işləmək olar".

Bu sözləri Axar.az-a açıqlamasında "Bəxt üzüyü" filmindən Moşu obrazıyla tanıdığımız xalq artisti Valeh Kərimov Sumqayıt Dövlət Musiqili Dram Teatrından azad olunması ilə bağlı danışarkən deyib:

"Mən uzun zamandır, Sumqayıt teatrında çalışıram. Bu neçə ildə uğurlarım olub. Sumqayıt teatrında ilk Xalq artisti adı alan mən olmuşam. Hacı İsmayılov, Afaq Bəşirqızı, Ramiz Novruzov, Sabir Məmmədov kimi aktyorlar bizdə işləyib, ancaq adı başqa teatrlardan almışdılar. Sumqayıt teatrında işləyə-işləyə ad alan ilk aktyor isə mənəm. Məndən sonra iki nəfərə Xalq artisti adı verilmişdi. Məncə, bir teatrda adı, tamaşaçılar arasında hörməti olan aktyorun çalışması həmin teatrın yalnız xeyrinədir. Sumqayıt teatrında yeganə Xalq artisti mən qalmışdım. Məni də çıxardıb atdılar".

Xalq artisti bu addımı özünə hörmətsizlik hesab etdiyini deyib:

"İşdən azad olunanda mənə dedilər ki, get, özümüz çağıracağıq. Müqaviləni dərhal da bağlamaq olardı. Bunu özümə hörmətsizlik hesab edirəm".

Əməkdaşımızın "Fəaliyyətinizi harada davam etdirəcəksiniz" sualına cavab olaraq V.Kərimov bildirdi ki, hələ başqa bir yerdən təklif almayıb:

"Əgər teatrlardan birindən təklif gəlsə, məmnuniyyətlə qəbul edərəm. Çünki hələ də təzə rollar oynamaq arzusundayam".

Qeyd edək ki, Valeh Kərimov yanvarın 16-da qanuni şəkildə işdən azad olunub. Prezidentin fərmanına əsasən, yaşı 65-dən yuxarı olanlar işdən azad olunurlar. Sadəcə, fəxri adı olanlar 70 yaşına kimi işdə saxlanılırlar. Əgər işçi xüsusi iş qabiliyyəti ilə seçilərsə, həmin yaşdan sonra müqavilə əsasında işləyə bilər.