Bakının Ləzgi məscidində təkfirçi fikirlərini təbliğ etdiyi iddia edilən vəhhabi Veysəl Orucova Türkiyə mediasından dəstək gəlib.

Axar.az xəbər verir ki, nə qədər qəribə də olsa, bu ölkənin vəhhabilərə qarşı olan mediası xəvaric olduğu və gizli şəkildə ərəb ölkələrinə tələbə göndərdiyi söylənən Orucova qahmar çıxıb.

"Timeturk.com.tr" internet portalı son günlər V.Orucov haqda yazılanları xatırladaraq məlumatları böhtan adlandırıb. Sayt V.Orucova hücumlar edildiyini yazıb.

Sitat: "Azərbaycan başda olmaqla, Qafqazda gənclərə islam dərsləri verən Veysəl Orucova qarşı İran tərəfindən dəstəklənən media tərəfindən kampaniya başlayıb. Bəzi media quruluşlarının elektron poçtuna Orucovun xəvaric olması haqda gələn məktubların yayımlanması özü tərəfindən də sərt etirazla qarşılanıb. Veysəl sosial şəbəkədə özü haqda yazılanları iftira adlandırıb. Orucov heç bir fakta söykənmədən məqalə yazıldığını bildirib".

Sayt yazıb ki, Orucov Mədinə İslam Universitetində təhsil alıb və 15 ilini elmə həsr edib:

"Hələ də Mədinədə yaşayan və elmi araşdırmalarını davam etdirən Orucov internet vasitəsi ilə Azərbaycan və Gürcüstandakı inanclılara fikirlərini çatdırır".