Ana səhifə Toplum |
Şuşa Teatrının direktoru Yadigar Muradovun Oda Teatrının direktoru, jurnalist Elmin Bədəlova və Oda Teatrına qarşı açdığı məhkəmə iddiasına yanvarın 16-da baxılıb və yekun qərar verilib.
Bu barədə Axar.az-a teatrın direktoru Elmin Bədəlov məlumat verib.
Aktyor məhkəmə qərarı onlara veriləndən sonra Apelyasiya Məhkəməsinə şikayət edəcəklərini bildirib: "Məhkəmədən mənə bildirdilər ki, Yadigar Muradovun mənə və Oda Teatrına qarşı qaldırdığı iddia təmin edilib. Ancaq onlar iddianın qismən, yaxud tam təmin olunduğu barədə heç bir məlumat vermədilər. Halbuki məhkəmə ekspertizasının rəyi mənim xeyrimə idi, lakin hakim əleyhimə qərar çıxarıb. Üstəlik də hakim mənə telefonda deyir ki, biz məhkəmənin hansı qərar çıxardığı barədə sizə məlumat verməyə borclu deyilik. Halbuki bu mənim və teatrım haqqında qərardısa, bu qərardan xəbər almaq haqqım, hüququm var. Üstəlik məhkəmə qərarı bizə verilmir ki, qərardan apelyasiya şikayəti verək".
Qeyd edək ki, proses Biləsuvar Rayon Məhkəməsində hakim Azər Səmədovun sədrliyi ilə keçirilib. Yadigar Muradov Elmin Bədəlovu bir neçə ay bundan öncə Elitar.az saytında yayımlanan yazıya görə məhkəməyə verib və ondan 20.000 manat tələb edir, eyni zamanda, şərəf və ləyaqətinin təhqir olunduğunu deyir. Bir neçə ay sonra həmin iddiaya Oda Teatrının da adı əlavə olunub. Lakin məhkəmə ekspertiziyası həmin yazıda təhqir elementlərinin olmadığını aşkarlamışdı. Yadigar Muradov Elmin Bədəlovun ondan üzr istəməsini tələb edir.
Tarix
2015.01.28 / 01:42
|
Müəllif
Axar.az
|