"Ola bilsin ki, Tədbirlər Planında dəyişiklik edilsin".

Bu sözləri Axar.az-a açıqlamasında Milli Məclisin İqtisadiyyat komitəsinin üzvü, deputat Vahid Əhmədov "2015-2025-ci illərdə Azərbaycan gənclərinin İnkişaf Strategiyası" proqramı çərçivəsində görüləcək işlərdən danışarkən dedi. Millət vəkilinin sözlərinə görə, yaxın zamanlarda gənclərin sosial problemlərinin həlli ilə bağlı addımlar atılacaq:

"Milli Məclisdə gənclərlə bağlı həmişə müzakirələr aparılıb. Bura xüsusilə ipoteka kreditlərinin verilməsi, gənclərin evlə təmin olunması, onların sosial vəziyyətinin yaxşılaşdırılması və s. aiddir. Bu müzakirələrdə biz həmişə çalışırıq ki, gənclərin normal yaşaması, normal fəaliyyət göstərməsi üçün məsələlər qanunlarda öz əksini tapsın. Bu barədə son zamanlarda da Milli Məclisdə müzakirələr aparılıb".

Qeyri Hökumət Təşkilatlarında (QHT) çalışan gənclərin də sosial problemlərinin həll olunması üçün müzakirələr aparıldığını deyən V.Əhmədov yeni sərəncam əsasında bəzi qanun dəyişikliklərini də istisna etmədi:

"Hətta mən bilirəm ki, QHT-lərə Dövlət Dəstəyi Şurası QHT təşkilatlarında çalışan gənclərin işlərinə baxır və həmkarımız Azay Quliyev tərəfindən onların fəaliyyəti yüksək qiymətləndirilir. Yəqin ki, Gənclər və İdman Nazirliyinin xüsusi tədbirlər planı var. Həmin tədbirlər planına uyğun müəyyən qanunlarda dəyişiklik edilə bilər. Gənclərin dövlət qurumlarında, müəyyən seçki orqanlarında təmsil olunması genişlənəcək. Məsələn, son bələdiyyə seçkilərində gənclərə və qadınlara daha çox üstünlük verildi. Ümumilikdə götürdükdə, gənclər həmişə dövlət başçısının diqqətində olub".