Ana səhifə Gündəm |
Azərbaycan ədəbiyyatına və ictimai həyatına ağır itki üz verib.
Axar.az xəbər verir ki, Azərbaycanın xalq şairi Vaqif Səmədoğlu Bakıda yaşadığı evdə dünyasını dəyişib. Yaxınlarının verdiyi məlumata görə, şairin harada və nə vaxt dəfn olunacağı hələlik dəqiqləşməyib.
Qeyd edək ki, dövlət dəstəyi ilə müalicə alan xalq şairi Vaqif Səmədoğlu onkoloji xəstəlikdən əziyyət çəkirdi.
Allah rəhmət eləsin!
***
Vaqif Səmədoğlu 1939-cu il iyunun 5-də Bakı şəhərində, məşhur Azərbaycan şairi Səməd Vurğunun ailəsində anadan olub. Bülbül adına musiqi məktəbində, Üzeyir Hacıbəyov adına Azərbaycan Dövlət Konservatoriyasında təhsil alıb. Azərbaycan Sovet Ensiklopediyası Baş redaksiyasında incəsənət redaksiyasının müdiri (1968-1971), "Oğuz eli" qəzetinin baş redaktoru (1992-1994) vəzifələrində çalışıb.
Çaykovski adına Moskva Konservatoriyasında ixtisas kursu keçib (1962-1963). Sonra Azərbaycan Dövlət Konservatoriyasında fortepiano üzrə ixtisas müəllimi (1963-1971), C.Cabbarlı adına "Azərbaycanfilm" kinostudiyasında kino-aktyor teatrının ədəbi hissə müdiri vəzifəsində (1982-1985) işləyib. Poeziya, teatr və dramaturgiya sahəsində də ciddi fəaliyyət göstərib. "Yeddi şeir" adlı ilk mətbu əsəri 1963-cü ildə "Azərbaycan" jurnalında dərc olunub. Bundan sonra dövri mətbuatda vaxtaşırı çıxış edib.
Azərbaycanın Milli Məclisinə deputat olub (2000).
Tarix
2015.01.28 / 11:58
|
Müəllif
Təhminə C.B.
|