PKK-nın İraqdan Türkiyəyə 1200 metrlik boru xətti çəkdiyi və bu borular vasitəsilə neft qaçaqçılığı ilə məşğul olduğu üzə çıxıb.

Axar.az Türkiyə mətbuatına istinadən xəbər verir ki, Silahlı Qüvvələrin Baş qərargahından verilən açıqlamada boru kəməri Hakkari vilayətində aşkar olunub:

"Maye yanacaq qaçaqçılığı etmək məqsədilə istifadə olunan və altı fərqli xətdən ibarət ümumi uzunluğu 1200 metr olan boru xətti aşkarlanıb".

Bildirək ki, boru kəməri üzə çıxdıqdan sonra PKK-nın qaçaq yolla gördüyü işlər araşdırılmağa başlanılıb. Məlum olub ki, təşkilatın gəlirləri arasında ən əhəmiyyətli yeri neft və siqaret qaçaqçılığı tutur. Bu iki məhsulun qaçaq yolla dövriyyəsinə isə Bərzaninin rəhbərlik etdiyi məlum olub.

Əsasən Habur əyaləti vasitəsilə edilən qaçaqçılıqda dağ yolları vasitəsilə siqaret və neft məhsulları daşınır.