Yanvarın 28-də Fransanın Strasburq şəhərində Avropa Şurası Parlament Assambleyasının növbəti iclası zamanı müxtəlif millətlərin diasporları etiraz aksiyaları keçiriblər.

Hüquq müdafiəçisi Əhməd Şahidovun Axar.az-a verdiyi məlumata görə, təqribən 40-a yaxın erməni nümayəndəsi də AŞPA binası qarşısında qondarma "erməni qoyqırımı"nın tanınması ilə bağlı toplaşıblar. Bu zaman isə qarşı tərəfdə Türkiyə və Azərbaycan diaspor nümayəndələrinin iştirakı ilə 5 min nəfəri əhatələyən izdihamlı mitinq davam edirmiş.

AŞPA müzakirələrində iştirak edən Azərbaycan Demokratiya və İnsan Haqları İnstitutunun rəhbəri Əhməd Şahidov ermənilərin aksiyasına yaxınlaşıb, ermənilərin nəyə etiraz etdiklərini soruşub və aksiya iştirakçılarını dinləyib. Daha sonra Xocalı soyqırımı barədə söz açan hüquq müdafiəçisi ermənilərin etirazları ilə qarşılaşıb və ermənilər uca səslə Əhməd Şahidova qarşı etiraz şüarları səsləndirməyə başlayıblar.

Aksiyanı mühafizə edən Strasburq polisi qarşıdurmanın baş verməməsi məqsədilə Əhməd Şahidovu hadisə yerindən uzaqlaşdırıb və ermənilərin aksiya keçirilən yeri tərk etmələrini tələb edib. Ermənilər aksiyanı yarımçıq dayandırıb və ərazini tərk ediblər.