"Komandaya uyğun olmayan adamların hakimiyyətdən uzaqlaşdırılması prosesi davam edəcək".

Bu sözləri Axar.az-a açıqlamasında politoloq Qabil Hüseynli deyib. Prezidentin "Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı"nın icrasının birinci ilinin yekunlarına həsr olunan konfransdakı nitqini şərh edən ekspert dövlət başçısının bir sıra önəmli məqamlara toxunduğunu bildirib:

"Fikrimi daha çox çəkən iqtisadiyyatın inkişafı ilə bağlı qaldırılan məsələlər oldu. Əliyev gizlətmədən bildirdi ki, dünyada neftin ucuzlaşması bir sıra proqramları təxirə salmaqla nəticələnəcək. Buna görə də əsas strateji proqramlara diqqət yetiriləcək. Bununla əlaqədar dövlət məmurlarına xüsusi tapşırıq verildi. Strateji proqramların yerinə yetirilməsi zamanı israfçılığın qarşısının alınması, maksimum qənaət tapşırılanlar sırasındadır. Prezidentin çıxışına görə, dünyada baş verən iqtisadi problemlər Azərbaycana elə də təsir göstərməyəcək. Bu, real proqnozdur. Çünki Azərbaycanın 50 milyarddan çox ehtiyatı var. Bu ehtiyatın hesabına manatı qoruyub saxlaya biləcəyik. Bundan başqa, Azərbaycan əhalisi sosial sahədə geriləmə görməyəcək. Ölkənin iqtisadi inkişafında da geriləmə olmayacaq. İ.Əliyev iqtisadi sahədə rəqəmlərlə danışaraq bir növ hesabat xarakterli çıxış etdi. O, ümumi daxili məhsulun və qeyri-neft sektorunun artdığını bildirdi".

Prezidentin çıxışının bəzi yüksək çinli məmurlara mesaj olduğunu deyən ekspert hakimiyyət daxilində kadr islahatının olacağını istisna etmədi:

"Hökumətdə komandanı formalaşdıran prezidentdir. Bu komanda ilə Əliyev bir sıra uğurlara imza atıb. Amma icra hakimiyyəti başçılarının yerinin dəyişdirilməsi onu göstərdi ki, islahatlar davam edəcək. Yaşı çatmış, müəyyən qədər komandaya uyğun olmayan adamların hakimiyyətdən uzaqlaşdırılması prosesi gedəcək və bunun anonsunu prezident özü verdi. Hər şeydən əvvəl bu, prezidentin səlahiyyətləri daxilində olan məsələdir. Özü lazım bilərsə, dəyişikliklər aparılacaq".