Dünən vəfat edən xalq şairi Vaqif Səmədoğlu ilə vida mərasimi keçirilir.

Axar.az xəbər verir ki, Akademik Milli Dram Teatrında keçirilən vida mərasimində çıxış edən Yazıçılar Birliyinin sədri yazıçı Anar Vaqif Səmədoğlunun ölümü ilə Azərbaycanın böyük Səməd Vurğun ailəsini, özünün isə yaxın dostunu itirdiyini bildirib.

Daha sonra Azərbaycan Respublikası Millətlərarası, multikulturalizm və dini məsələlər üzrə Dövlət müşaviri, akademik Kamal Abdulla, Mədəniyyət və Turizm Nazirinin müavini Ədalət Vəliyev, xalq şairi Nəriman Həsənzadə və millət vəkili Nizami Cəfərov vida mərasimində çıxış edərək Vaqif Səmədoğlunun Azərbaycan üçün önəmindən danışıblar.

Vaqif Səmədoğlunun ailəsi adından çıxış edən mərhum şairin kürəkəni Aqşin anım mərasiminə toplaşanlara öz təşəkkürünü bildirib.

Hazırda anım mərasiminin rəsmi hissəsi yekunlaşıb və şairin sevənləri onu son mənzilə yola salırlar.

Mərhum xalq şairi I Fəxri Xiyabanda dəfn olunacaq.

Qeyd edək ki, Azərbaycanın xalq şairi Vaqif Səmədoğlu dünən 76 yaşında Bakıda yaşadığı evdə dünyasını dəyişib.