Bosniya və Herseqovinanın Xarici Ticarət və İqtisadi Münasibətlər Nazirliyi Ukraynaya silah göndərilməsini təxirə salmaq haqqında qərar qəbul edib.

Axar.az bildirir ki, bu barədə nazirliyin saytında məlumat verilıb. Adı çəkilən nazirlik Ukraynaya beş milyon avroluq silah ixracına razılıq verəcək son instansiya idi. Sifarişçi Ukrayna DİN-dir.

Qeyd edək ki, Bosniya Müdafiə və Təhlükəsizlik nazirlikləri, XİN və Kəşfiyyat və Təhlükəsizlik Agentliyi silah ixracının lehinədirlər.

Ukraynaya silah ixracına qarşı olan Xarici Ticarət və İqtisadi münasibətlər naziri Boris Tuçiç bununla əlaqədar keçən həftə istefa verib. Nazirlik başçısının olmadığı müddətdə qərarı nazir müavini Ermina Salkiçeviç-Dizdareviç imzalaya bilər, lakin daxili məsləhətləşmələrin nəticələrinə əsasən o, sənədə imza atmayıb.

"Nazirlik məsul bir qurum kimi Bosniya və Herseqovina rəyasət heyətinin rəsmi mövqeyini gözləyəcək", – deyə məlumatda bildirilir.