"Mən İraqda, Türkiyədə, Rusiyada, Qazaxıstanda olduğum səfərlər zamanı hər vaxt Azərbaycanımızın mənafeyini müdafiə etmişəm. Ölkəmizin və xalqımızın başına gətirilən müsibətlərdən, Xocalı soyqırımından, erməni işğalından danışmışam. İraqa altı nümayəndə heyətilə getdiyimiz zaman oğlum İsmayıl Əliyev də İraqda Xocalı qətliamının təbliğində işlər görüb. Ancaq bu gün yanlış informasiya yayanlar var. Hansı ki, Biləcəridən o tərəfə çıxmayıblar. Bu xəbərləri oxuyanlar səhv fikirlərə qapılmasınlar".

Bu sözləri Axar.az-a "Diplomat" qəzetinin baş redaktoru, kürd əsilli Tahir Süleyman övladı barəsində yazılanlara münasibət bildirərkən deyib. Onun sözlərinə görə, oğlu İsmayıl Əliyevin toyuna kürd liderlərini dəvət etməsi haqda yayılan məlumatlar kökündən yanlışdır. T.Süleyman kürd liderlərindən kimsənin Bakıda keçiriləcək toy mərasiminə dəvət etmədiyini qeyd edib:

"Bizim İraqa növbəti səfərimiz gözlənilir. 24 apreldə ermənilərin qondarma soyqırımına qarşı müxtəlif şəhərlərdə Xocalı soyqırımı barəsində tədbirlər təşkil edəcəyik. Məqsədimiz Azərbaycan xalqının və dövlətinin mənafeyinə uyğun iş görməkdir".

Qeyd edək ki, azinforum.az saytı T.Süleymanın martın 29-da oğluna keçirəcəyi toya kürd liderlərini dəvət etdiyini yazıb. Saytın məlumatına görə, T.Süleyman PKK simpatizanı kimi tanınır.