Bu gün Özbəkistanda təxminən 21 milyon seçicinin iştirakı ilə prezident seçkiləri keçirilir.

Axar.az xəbər verir ki, parlamentdə üstünlüyə malik Liberal Demokrat Partiyasının namizədi, hazırki prezident İslam Kərimovla Xalq Demokrat Partiyasının lideri Hatamcan Ketmanov, Ədalət Sosial Demokrat Partiyasının lideri Nariman Umarov və Milli Diriliş Demokrat Partiyasından tanınmış hüquqşünası Akmal Saidov mübarizə aparacaq.

Seçkiləri ATƏT, MDB və Şanxay Əməkdaşlıq Təşkilatı müşahidəçilərinin də yer aldığı 50-ə yaxın ölkədən 300-dən çox müşahidəçi və 430 yerli və xarici jurnalist izləyir.

Yerli saatla 06:00-da başlayan seçkilər 20:00-da tamamlanacaq.

Xatırladaq ki, hazırki prezident İslam Kərimov 1990-cı ildən ölkəyə başçılıq edir.