Millət vəkili Musa Qasımlı 1918-ci il mart soyqırımını əks etdirən foroşəkillər paylaşıb.

Axar.az xəbər verir ki, həmin fotolar Rusiya və Gürcüstan arxivlərindən əldə edilib. Millət vəkili fotoları belə şərh edib:

"Sizə Rusiya və Gürcüstan arxivlərində saxlanılan üç fotoşəkli təqdim edirəm. Fotoşəkillərdən ikisi 1918-1920-ci illərdə daşnaklar tərəfindən İrəvan ətrafında azərbaycanlılara məxsus dağıdılmış yaşayış məntəqəsinindir. Digər bir fotoşəkil isə 1918-ci ildə Bakıda daşnak dəstəsidir. Fotoşəklin altındakı yazıdan aydın olur ki, birinci cərgədə soldan sağa oturan ilk adam Azərbaycan xalıqının kütləvi surətdə öldürülməsində xüsusi ad çıxarmış Stepan Şaumyanın oğlu Suren Şaumyandır".

M.Qasımlı 1918-ci il 31 martda erməni-daşnak və bolşevik qüvvələrinin Bakıda azərbaycanlılara qarşı törətdiyi soyqırımı bəşəriyyətə və sivilizasiyaya qarşı ağır cinayət kimi qiymətləndirib:

"Əgər biz 1918-ci ilin martına qədərki buna bənzər hadisələrdən ibrət alsaydıq, müstəqil dövlətimiz olsaydı, 31 mart bəlkə də olmaya bilərdi. Əgər 31 martdan ibrət alsaydıq və güclü dövlətimiz olsaydı, onda Xocalıda törədilən soyqırım olmazdı. Hesab edirəm ki, belə hadisələrin gələcəkdə təkrarlanmaması üçün dövlətimiz və millətimiz güclü olmalıdır".